ეს პოლიტიკა განმარტავს, როგორ ამუშავებს შპს ტელვო ვეტმენში ორგანიზაციის მიერ შეტანილ პერსონალურ მონაცემებს, როდესაც ორგანიზაცია არის დამუშავებისთვის პასუხისმგებელი პირი, ხოლო შპს ტელვო — დამუშავებაზე უფლებამოსილი პირი. სავალდებულო პირობები მოცემულია მონაცემთა დამუშავების ხელშეკრულებაში.

1. როლები

ორგანიზაცია განსაზღვრავს, რა მონაცემი შეიტანოს, რა მიზნისთვის გამოიყენოს, ვის მისცეს წვდომა, ვის გაუგზავნოს შეტყობინება და როდის შეასწოროს ან წაშალოს ჩანაწერი. ვეტმენი ამ გადაწყვეტილებებს ასრულებს პლატფორმის ფუნქციებით და ორგანიზაციის დოკუმენტირებული დავალებით.

ცალკე შემთხვევებში შპს ტელვო თავად არის პასუხისმგებელი პირი — მაგალითად, ანგარიშის ადმინისტრირების, უსაფრთხოების ჟურნალის, ბილინგისა და მხარდაჭერის კომუნიკაციისთვის. ეს დამუშავება აღწერილია კონფიდენციალურობის პოლიტიკაში.

2. მონაცემები და სუბიექტები

ორგანიზაციის დავალებით შეიძლება დამუშავდეს:

• კლიენტის ან წარმომადგენლის სახელი, საკონტაქტო ინფორმაცია, მისამართი, პირადი ნომერი, შენიშვნები და ანგარიშსწორების ინფორმაცია;
• ცხოველის იდენტიფიკაცია და მასთან დაკავშირებული კლინიკური ჩანაწერი, დიაგნოზი, დანიშნულება, ლაბორატორიული შედეგი, ოპერაცია, ჰოსპიტალიზაცია, ფოტო, ვიდეო და დოკუმენტი;
• თანამშრომლის, გარე კონსულტანტისა და მომწოდებლის საკონტაქტო და საქმიანობის მონაცემები;
• ტექნიკური მონაცემები — შესვლის დრო, IP მისამართი, გაზიარების გამოყენება და მოქმედების ჟურნალები.

ცხოველის ჯანმრთელობის ჩანაწერი თავისთავად ადამიანის ჯანმრთელობის მონაცემი არ არის. თუმცა თავისუფალ ტექსტსა და ატვირთულ ფაილში შეიძლება მოხვდეს ადამიანის მგრძნობიარე ინფორმაცია; ორგანიზაციამ ასეთი მონაცემი არ უნდა შეიტანოს, თუ ეს აუცილებელი და კანონიერად დასაბუთებული არ არის.

3. მიზნები და ძირითადი წესები

მონაცემს ვამუშავებთ პლატფორმის ფუნქციების მისაწოდებლად: ჩანაწერის შენახვა, ძებნა, ჩვენება, დოკუმენტის შექმნა, ანგარიშგება, შეტყობინების გაგზავნა, მხარდაჭერა, უსაფრთხოება და ბექაფი.

მოქმედებს შემდეგი წესები:

1. მონაცემს ვამუშავებთ მხოლოდ ხელშეკრულების, ორგანიზაციის პლატფორმაში მოქმედებისა და მისი დამატებითი წერილობითი მითითების ფარგლებში;
2. სხვადასხვა ორგანიზაციის მონაცემი ლოგიკურად განცალკევებულია და წვდომა როლებით იზღუდება;
3. ჩვენი პერსონალი მონაცემზე წვდომას იღებს მხოლოდ სამუშაო საჭიროებით და კონფიდენციალურობის ვალდებულებით;
4. ორგანიზაციის მონაცემს არ ვყიდით, რეკლამისთვის არ ვიყენებთ და სხვა ორგანიზაციას არ ვაჩვენებთ;
5. მონაცემი ინახება მხოლოდ მომსახურების, ხელშეკრულების, კანონიერი მოთხოვნისა და ტექნიკური ბექაფის ციკლისთვის საჭირო ხნით.

4. მიმღებები და საერთაშორისო დამუშავება

მომსახურებაში შეიძლება მონაწილეობდნენ ჰოსტინგის, შეტყობინების ან სხვა დამხმარე მომსახურების მიმწოდებლები. მოქმედი სია, დანიშნულება და მდებარეობა მოცემულია ქვე-დამმუშავებლების სიაში.

ძირითადი აპლიკაციის სერვერული ინფრასტრუქტურა მდებარეობს DigitalOcean-ის ფრანკფურტის რეგიონში, გერმანიაში. დამატებითი გარე ფუნქცია, მაგალითად SMS, მონაცემს იღებს მხოლოდ მაშინ, როცა იგი რეალურად არის კონფიგურირებული, ორგანიზაცია ფუნქციას იყენებს და მიმწოდებელი წინასწარ არის შეტანილი მოქმედ სიაში.

5. უსაფრთხოება და ინციდენტი

გამოყენებულია HTTPS/HSTS, პაროლის ჰეშირება, სესიის დროითი შეზღუდვა, შესვლის მცდელობების ლიმიტი, როლები, ორგანიზაციების გამიჯვნა, დაცული ფაილების გაცემა, მნიშვნელოვანი ჩაწერებისა და უსაფრთხოების მოვლენების ჟურნალები, კონფიგურაციის საიდუმლოებების დაშიფვრა და ბექაფი. ზომების უფრო სრული აღწერა არის DPA-ს დანართ B-ში.

ინციდენტის აღმოჩენისას ვიწყებთ შეფასებას, შეკავებასა და დოკუმენტირებას და ორგანიზაციას გაუმართლებელი დაყოვნების გარეშე ვაწვდით მისთვის ხელმისაწვდომ და ვალდებულებების შესასრულებლად საჭირო ინფორმაციას.

6. სუბიექტის მოთხოვნები და დასრულება

თუ ორგანიზაციის კლიენტი ან სხვა სუბიექტი მოგვმართავს ორგანიზაციის კონტროლის ქვეშ მყოფ მონაცემზე, მოთხოვნას ორგანიზაციასთან ვამისამართებთ. ორგანიზაციას გონივრულად ვეხმარებით მონაცემის მოძიებაში, ასლის მომზადებაში, შესწორებაში, შეზღუდვასა და წაშლაში.

ხელშეკრულების დასრულებისას ორგანიზაციას შეუძლია მოითხოვოს ხელმისაწვდომი მონაცემის დაბრუნება ან წაშლა. პროცესი დღეს შეიძლება საჭიროებდეს ხელით შესრულებას. კანონით სავალდებულო შენახვა და ბექაფის ციკლი წაშლაზე უპირატესია.

7. ორგანიზაციის პასუხისმგებლობა

ორგანიზაცია პასუხისმგებელია კანონიერ საფუძველზე, გამჭვირვალე ინფორმირებაზე, მონაცემის მინიმიზაციასა და სისწორეზე, წვდომების მართვაზე, გაზიარების ბმულებზე, შეტყობინების გაგზავნის საფუძველზე და საკუთარი მომხმარებლების ანგარიშების უსაფრთხოებაზე.

კითხვებისთვის გამოიყენეთ კონტაქტის გვერდი.